Wussat-E-Chashm Ko Andoh-E-Basarat Likha

Wussat-E-Chashm Ko Andoh-E-Basarat Likha
Main Nay Ik Wasl Ko Ik Hijr Ki Haalat Likha

Main Nay Likha Keh Saf-E-Dil Kabhi Khali Na Hui
Aur Kabhi Khali Hui Bhi To Malaamat Likha

Sirf Aawaz Kahan Tak Mujhay Jaari Rakhti
Main Nay Chup Saadh Li Sannatay Ko Aadat Likha

Yeh Safar Paaoon Hilanay Ka Nahin Aaankh Ka Hai
Main Nay Is Baab Main Ruknay Ko Masaafat Likha

Main Nay Perwaaz Likhi Hud-E-Falak Say Aagay
Aur Bay Baal-O-Pari Ko Bhi Nehaayat Likha

Main Nay Dasktak Ko Likha Kash-Makash-E-Bay Khabri
Jumbish-E-Parda Ko Aanay Ki Ijaazat Likha

Likhnay Walon Nay To Honay Ka Sabab Likha
Main Nay Honay Ko Na Honay Ki Wazahat Likha

Ashk Agar Sab Nay Likhay Main Nay Sitaray Likhay
Aajzi Sab Nay Likhi Main Nay Ibaadat Likha

Main Nay Khushboo Ko Likha Dastaras-E-Gumshudgi
Rung Ko Faasla Rakhnay Ki Riwaayat Likha

Zakhm Likhnay Kay Liye Main Nay Likhi Hai Ghaflat
Khoon Likhna Tha M agar Main Nay Haraarat Likha

Husn-E-Goyai Ko Likhna Tha, Likho Sargohsi
Shor Likhna Tha So Aazar-E-Sama’at Likha

Meray Sir Pay Kabhi Afsos Ka Saya Na Reha
Ranj Tha Jis Ki Jagah Main Nay Shikayat Likha

Main Nay Tabeer Ko Tehreer Main Aanay Na Diya
Khwab Likhtay Huay Mohtaj-E-Bashaarat Likha

Koi Aasaan Rafaqat Nahin Likhi Main Nay
Qurb Ko Jab Bhi Likha Juzw-E-Raqabat Likha

Itnay Daawon Say Guzar Ker Yeh Khayal Aata Hai
Azm Kya Tum Nay Kabhi Harf-E-Nadamat Likha