Deewano Ko Samjhaya Nahi Karte !!!

Apne ehsaas se chu kar mujhe sandal kar do,
mein ke sadiyon se adhoora hoon mukammal kar do..

na tumhain hosh rahe aur na mujhe hosh rahe
iss qadar toot ke chaho mujhe pagal kar do..

tum hatheli ko mere pyaar ki mahendi se rango
apni ankhon mein mere naam ka kajal kar do..

iss ke saaye mein mere khwaab dahak uthenge
mere chehre pe chamakta hua aanchal kar do..

dhoop hi dhoop hoon mein toot ke barso mujh par
iss qadar barso meri rooh mein jal thhal kar do..

jaise sehraoon mein har shaam hawa chalti hai
iss tarah mujh mein chalo aur mujhe thal kar do..

tum chupa lo mera dil aut mein apne dil ki
aur mujhe meri nigaahon se bhi ojhal kar do..

masla hoon to nigaahein na churao mujh se
apni chahat se tawajjo se mujhe hal kar do..

apne gham se kaho har waqt mere saath rahe
ek ahsaan karo iss ko musalsal kar do..

mujh pe cha jao kisi aag ki soorat jaana
aur meri zaat ko sukhaa hua jungal kar do...

Dil To Kehta Hai Zamane Se Chupa lun Tujh Ko,
Dil Ki Dharkan Ki Tarha Dil Mein Basa lun Tujh Ko,

Koi Ehsaas Judai Ka Na Rahne Paye,
Iss Tarha Khud Mein Meri Jaan Sama lun Tujh Ko,

Tu Jo Roothe Kabhi Mujhse Mere Dil Ke Malik,
Sari Duniya Se Khafa Hoke Mana Lun Tujh Ko,

Jab Bhi Dekhu Tere Chare Pe Udassi Ka Sama,
Yahi Chahoon Ke Kisi Tarha Hasa lun Tujh Ko,

Tu Jo Thak Har Ke Laute To Yehi Khwahish Hai,
Inn Palkoon Ki Chaon Mein Sula lun Tujh Ko...